A
Abih sandiang dek bagesoh,
Abih miang dek ba gisie,
Abih biso dek biaso,
Abih gali dek galitih
Alang tukang binaso kayu,
Alang cadiak binasi adat,
Alang arih badan binaso
Alun pai lah babaliek
Alu dibali lah dijua
Alun dimakan lah baraso
Alun bakilek lah ba kalam,
Bulan lah langkok tigo puluah,
Balun diliek lah dimakan,
Raso lah tibo dalam tubuah
Anak dipangku dicampakkan
Baruak di rimbo disusu-an
Anak ikan dimakan ikan,
Gadang ditabek anak enggiri,
Anak bukan dunsanak bukan,
Budi saketek rang haragoi
Anak urang di Jambu Aie
Nan barumah di tapi jalan
Nak kok carai ikan jo aie
Minyak nan alah den asiangan
Apo dirandang di kuali
Padi sipuluik Tambun Tulang
Apo dipandang pado kami
Ameh tidak bangsopun kurang
B
Babagai-bagai namonyo nyanyi
Danga dek mamak nama nan suko
O sadang manga anak den kini
Sadang bagaluang la jo mandenyo
Badeta batiak nan balang
Dipakai datuak nan rapai
Kok karam biduak den tompang
Kamalah badan ka manggabai
Bajalan surang nak dahulu,
Bajalan ba duo nak di tangah
Bakato paliaro lidah
Bajalan paliaro kaki
Lidah tataruang, Ameh padanannyo
Kaki tataruang, inai padanannyo
Mangecek siang caliek-caliek
Bakato malam agak-agak-i
Murah kato, takatokan
Sulik kato jo timbangan
Bia lambek asa salamaek
Lamo lambek ka tibo juo
Nan kanduang dunia akiraek
Anto kato sapadiah nangko
Bunyi saluang baibo-ibo
Baduo kami ma iriangan
Usah tabatiak tabarito
Kito tatampuah jo larangan
C
Cadiek ba soal jawab
Cadiek kaji mangaji
Cadiek kecek mangecek
Cadiek cando kiyo
Cadiek tipu manipu
Cadiek baraka
Sawek nan dari Mandiangin,
Dibaok nak urang ka Biaro,
Takileh rupo dalam camin,
Inyo dibaliek itu pulo.
Curito urang balapau, samisa kulup main bola, ado nan tagak digalandang,ado nan sayok kiri kanannyo, ado nan di beknyo
Balapaupun tabagi tigo:
Partamu tagak dimuko
Karajo maagak maagiahkan
Tau dilonjoang sanduak nasi
Tau diragam macam gulai
Tau dikuah nan ka rasan
Lakeh manyauik mintak urang
Urang tangah:
Manjadi si malin pantan
Manatiang jamba ka meja
Ma atok piriang di langan
Kok meja patuik baseka
Patambuahan nan ka basilau
Lap tangan basadiokan
Ataupu obeng tusuak gigi
Itu karajo patang pagi
Tantang urang di balakang
Diam di dapua madok api
Bagaua jo barang masak matah
Urang nan pandai main pisau
Mangaji gantang patanak-an
Kok nasi talabiak matah
Gulai ta masin jo tapadeh
Bara jo gadang karek dagiang
Taruih ka bumbu ka pamasak
Itu sikola urang dapua
Tasabuik kiper di tiang gol
Manyambuik bola masuak gawang
Tangkok suok jambo ka kida
Itulah toke induak samang
Bos lapau gala baliau
Duduaknyo di laci meja
manuai ma ngauik pitih
D
Dilauik ikan kanai pukek,
Dirimbo tupai manangguangkan
Dima tambilang tahantak
Disinan tanaman tumbuah
Dima dipapek cupak
Disinan adat balabueh
E
F
Gadang-gadang kayu di rimbo
Dibaliak bukik ka sikabau
Kadang-kadang ati den ibo
Ribuik bak bunyi rang maimbau
G
Golek lah tibo dinan data,
Golek nan indak ba golek la-i,
Karano talatak suatu di tampeknyo,
H
Hanyuik ba pintehi,
Hilang ba cari,
Tarapuang ba kaik,
Tabanam ba silami
Siang dicaliek-caliek,
Malam di danga-danga,
Lupo ba ingekkan,
talalok ba jagokan,
Senteang ba bilai,
Kurang ba tukuak
Panjang ba karek,
Singkek ba uleh
Hitam tahan tapo,
Putieh tahan sasah,
Disasah ba habih aie,
Dikikih ba habih basi
I
Ibaraiek badan joloang gadang
Indak ado ba ati rusuah
Ati gadang ba paturuikgan
Luko lamo alun lai sanang
Lah tampak pulo tampaek jatuah
Lah sarik badan ma ilakgan
Indak batamu rueh rueh jo buku
Buangan di ambiak rang sabalah
Awak payah menungkai sajo
Lah rabah didabiah urang
Intan disangko kilek kaco,
Jalan dialieh dek urang lalu,
Cupak dipapek rang manggaleh,
Adat dialieh dek urang datang
K
Karimboba bungo kayu
Ka sawh ba bungo ampieng
Ka sungai ba bungo pasie
K atambang ba bungo ameh
Ka lauik ba bungo karang
Kok jarieh manantang bulieh
Kelok ampek mandaki jalan
Tampak dilereang tangah koto
Lah malang tibo dibadan
Sadang bansaek panyakik tibo
Kok dilipek salaweh kuku
Dikambang salaweh alam
Kok indak ado barado
Takkan tampuo basarang randah
Kok indak basab bakarano
Takkan limbago kabarubah
Kupi sarimih kurang paik
Kaleknyo tingga di rakuangan
Baju baguntiang tak bajaik
Baa nyo denai manyaruangan
L
Lah rusuah tabiang jo parik
Dek ulah hujan tangah malam
Lah pagi sajo barantinyo
Lah sasek pulo tukang jaik
Banang basaua bakulindan
Sikoci lupo mamasangnyo
Luruih jalan ka kota Padang
Bakelok sampai ka muaro
Pambaleh jaso rang nan hilang
Ulang-ulangi lah pusaronyo
M
Malangkah diujuang karih,
Bakato diujuang lidah,
Lambang mangati samo barek,
Lambang mahukum samo die
Mancancang ba landasan
Malompek ba situmpu
Mangaruak sa abih sauang
Ma awai sa abih raso
Ma ngati samo barek,
Maukua samo panjang,
Dimato indak dipiciangkan,
Dparuik indah dikampihkan,
Di dado indak dibusuangkan
N
Nak hilie ka Indogiri
Singgah sabanta ka ladang
panjang
Dimano mulo adat badiri
Di Pariangan Padangpanjang
Nak urang Padangpanjang
Ka balai ari lah sanjo
Urang jajok tasangko sayang
Alamaek badan ka cilako
Nan barek samo dipikue
Nan ringan samo dijenjeang
Kato surang dibulek-i
Kato basamo dipaiyokan
Sadanciang bak basi
Sa ciok bak ayam
Bulek aie ka pambuluah
Bulek kato ka mufakat
Kamudiek saantak galah
Kailie sarangkuah dayuang
Sasuai lahie jo bathin
Sasuai sarak jo hakikaek
Nan bungkuak ka tangkai bajak,
Nan luruih ka tangkai sapu,
Satampok ka papan tuai,
Nan ketek ka psak suntiang,
Panarahan ka kayu api,
Abunyo ka pupuak padi
Nan kuriek kundi,
Nan merah sago,
Nan baiek budi,
Nan indah baso
O
P
Palembayan raminyo Satu
rami manjalang sanjo ari
Gadanglah arok awak daulu
Ka buah tangih taun kini
Panakiek pisau sirauik,
Petungkek batang lintabuang,
Salodang ambiak ka niru,
Satitiek jadikan lauik,
Sakapa jadikan gunuang,
Alam takambang jadi guru
Palik sadah ka daun siriah
Langkok jo Gambia mamakannyo
Sapahnyo usah dibuangan
Sapatah kaji basalisiah
Alun tantu salah jo bananyo
Anto den surang ba tinggakan
Pulau pandan jauah ditangah,
Dibaliek pulau si angso duo,
Hcua badan dikanduang tanah, budi baiek takana juo
Pincalang biduak rang Tiku
Badayuang sambie manungkuik
Basilang kayu dalam tunggku
Disinan api mangko hiduik
Pisang ameh baok ba laie
Pisang lidi diateh piti
Utang ameh buliah dibaie
Utang budi dibaok mati
Pituah mamak :
Dek awak lai pangasurau
Rajin mandanga guru-guru
Walau kaji tak sampai
Larang pantangan lai bajago
Picayo mamak tantang itu
Jikok baniaik pai marantau
Jikok mamncancang balandasan
Jikok mandidih bapamacik
Marantau io mambao pokok
Tapi nan pokok sabana pokok
Bukanlah ameh nan bataie
Sabab arato babuhua sintak
Bukan uang nan balimpan
Pitih manantang abih
Kabau jariah babeleang sajo
Jua bali panuah ka bawah
Galeh abih pitih tak timbua
Gadang muaro dari ulu
Kok mati badan kini nangko
Badarun tanah panggalian
Baserak iae panalakin
Dibaliak papan nan saalai
Datang malekaek pai batanyo
Jangan tanyo ka tajawab
Utang tak lansai nan takana
Lah jadi paringek dinan tuo,
Ka buah andai din an mudo
Kok tajajak isuak kota gadang
Ingek-ingek iduik disinan
Ibaraek kota kambang,
Bungo manjadi paga jalan
Saloroang bungo kambang nantun
rono elok, tangkainyo lamah
pantang indak, larangan lungga
buliah diambiak dipatahkan
buliah digatie salai-salai
tiang diurang ka manggatie
namun samantangpun baitu
usah tadayo dirancaknyo
daun malingka jadi jarek
jan tatipu dek sirahnyo
duri baracun mintak darah
lah banyak kumbang nan tabunuah
jampang diparuik-an,
alamat badan ka binaso
pitih abih badan sansaro
sasa nan indak kunjuang sudah
di dunia gilo jo ratok
di akiraek rintan jo pakiak
batundo-tundo masuak api
tapi dek biaso mato paliangan setan
napasu condoang ka kida
narako bapaga lamang
awak bak pinang sirah ikua
tuo alun mudo talampau
maliek anau mintak sigai
badarak-darak tunggak iman
babaliang-baliang paratian
parang dubilih jo malekat
ilang nan bana dek salero
dek arah takadia Allah
tibolah aruah rang nan hiduik
baambek kaki ka talangkah
Ado tigo amanat mamak
Itulah pokok nan usali
Kok la~i amanat tapakaikan
Pitaruah tapaliaro
Ka luluak waang indah balacah
Duri nan indak malukoi
Buieh dibari bapamatang
Partamu :
Pandai bagaua jo nan banyak
Tirulah hiduik buluah batuang
Masa rabuang carian urang
Lah tuo banyak gunonyo
Salodang paguno pulo
Tabiang tanang lurah barangin
Tanah dilereang paradoan
Aka kadapek kajunjuang
Usah ditiru rumpun sakek
Iduik manyisiah di nan langang
Tumbuah dipisak pangka dahan
Arok dilabo diri surang
Batang tapaso ndak takana
Cilako diri tu namonyo
Kadua :
Luruih jo bana
Kok luruih dirantang tali
Kok patah dimakan siku
Tagak alih duduaknyo waw
Rabah sarupo ya gadang
Duduak usah bapaliang-paliang
Tagak usah taranjak-ranjak
Mangecek jan baduto
Bajanji jan pamukia
Dibari amanak jan kianat
Katigo :
Batanang
Urang basampan awak baranang
Kalau lai manompang aruih
Kasamo tibo diulak pulau
Urang balari awak marangkak
Turuikkan jalan mamutuih
Ka samo sampai jo nan banyak
Batengganglah jo nan sampik
Bao baputa kincie-kincie
Urang lari awak ka suruik
Itu pantang laki-laki
nan panjang jari, gadang kauiknyo
nan laweh paruah gadang cotoknyo
nan gapuak taba lamaknyo
Kanarako jalan tarantang
Kasarugo labuah lah tarang
Tingga di kito mananpuahnyo
Urang basorak awak mamakiak
Urang bapaneh awak basangai
Kabangih kasia berang
Baririang ka rumah bako
Bararak ka rumah mamak
R
Rang Padang pai manggaleh,
Mambao barang sajunjuangan,
Ikan gadang kok kanai papeh,
Pantau jo bada bapantiangan
Rasaki indak sarangkai
Bagian alang untuak alang
Bilalang makanan ruak-ruak
Utang di kito bausao
Rumah gadang batapi perak,
perak batapi batang padi
awak sanang badan takucak
manaruah seso dalam ati
Rumah gadang madok ka baruah
Buatan urang dari ranah
Anto alun ta pasang juo
Kapatang awak oi camiah jatuah
Untuang diambek banang lawah
Kini ta gamang-gamang juo
Rumah gadang gajah maharam
Lumbuang baririk dihalamannyo
Sabuah banamo sibayau-bayau
Ditangah banamo Sitinjau Lauik
Ditapi banamo lumbuang Baperong
Rumah sudah tokok tukang babunyi,
Api padam puntuang barasok,
Minyak abih samba tak lamak,
Arang abih basi binaso
Pulai batingke naiek aningga kan rueh dengan buku
Harimau maninggakan balang,
Mati gajah meninggakan gadieng
Manusie batingkk turun, maninggakan jaso
S
Sawah diagieh ba pamatang
Ladang dibari ba bintalak
Nak babedo tapuang jo sadah
Nak ba biteh minyak jo aie
Si Muncak mati tarambau
Ka Ladang mambaok ladiang
Lukolah pao kaduonyo
Adaek jo sarak di Minangkabau
Bak umpamo aua jo tabiang
Sanda manyanda ka duonyo
Simpang ampek di koto tuo
Nan kasimpang ka muaro paneh
Ka suok ka koto gadang
Nak mamintak padi nan ampo
Nan samo tumbuah jo nan boneh
Nak samo disabik urang
Singkek bauleh,
Kurang batukuak,
Rusuah babujuak,
Tangih baantokkan,
Jatuah basambuik,
Tagamang bajawek,
Hilang bacari,
Tabanam basilami
T
Tagang bajelo-jelo
Kandua badantiang-dantiang
Tak ado gadiang nan tak ratak,
Tak ado tupai nan tak gawa,
Manusia basifat kilaf,
Nan qadim hanyo sifat Allah
Tak lakang dek paneh
Tak lapuak dek hujan
Dianjak tak layua
Dicabuik tak mati
Dibasuah ba abih aie
Dikikih ba abih basi
Tasindorong jajak menurun,
Tatukiek jajak mandaki,
Adat jo sarak kok tasusun,
Bumi sanang padi manjadi
U
Urang manjua lah balabo
Pokoknyo murah arago taluak
Ka cino mambali kontan
Ka Arab babaia lunas
Di awak modal alun sampai
samparah tabu nan bakilang
Aienyo diparah urang daulu
Urang ingek pantang takicuah
Urang jago pantang kamaliengan
Ingek-ingek sabalun kanai
Kok malantai sabalun lapuak
Kok maminteh sabalun anyuik
W
Y
Tidak ada komentar:
Posting Komentar